روتيني باستا بالصلصة الحمراء

 

باستا بصلصة الفلفل البارد المشوي مع الجبن الأبيض اللذيذة إستخدمت في إعدادها فلفل بارد مشوي جاهز معلب أخذته من جمعية  إذا ما حصلتيه تقدرين تسوينه بنفسج
طريقته سهلة وهي تاخذين فلفل بارد أحمر وتحطينه مباشرة على الجوله (النار) وإشويه لين تسود القشرة، تالي خليه على جنب لين يبرد شويه وبعدين قشريه وحاولي تشيلين كل القشرة السوداء من الفلفل، غسلي الفلفل شويه بالماي علشان تتخلصين من السواد تماماً.

إستخدمت نكهة جديدة بأوراق المشموم، أغلب البيوت يزرعون المشموم للزينة، ريحته حلوه فإذا إستخدمتيه للصلصة يطيبها بروائح عطرية جميلة إذا ما توفر عندج المشموم إستخدمي الريحان.

الجبن الأبيض يعطي الباستا قوام كريمي حلو، البشاميل سويه بنفسج أو إستخدمي البشاميل الجاهز،

 

المقادير :

معكرونة لولبية

5 حبات فلفل بارد أحمر مشوي

4/3 علية جبنة بيضاء مختارة كاملة الدسم 500 جرام ( المراعي )

2/1 كوب جبنة بارميزان

6-8 أوراق مشموم

2/1 ملعقة صغيرة ثوم مهروس

بصلة صغيرة مفرومة

1 كوب بشاميل

قليل من الماء الساخن

4/1 ملعقة صغيرة فلفل أسود

ملح حسب الرغبة

  

حطي الفلفل الأحمر في الخلاط

 

 

شغلي الخلاط وخليه لين تنهرس المكونات عدل

 

 

الحين سوي المعكرونة حطي في الجدر ماي وشوبة زيت وملح وخليه لين يطبخ الماي (يغلي)

 

بعد ما تنضج المعكرونة صفيها (بالمشخاله) وصبي عليها ماى بارد وخليها على كتر (جنب)

 

 

في نفس جدر (قدر) سلق المعكرونة حطي شوية زيت زيتون بعدين حطي البصل

 

وشوحيه (إخلطيه) لين يذبل لا تخلينه يتحمر

 

أول ما تشوفين البصل ذبل حطي الثوم وقلبيه بسرعه ما نبي الثوم يحترق

 

صبي (إسكبي) خلطة الفلفل الأحمر على البصل وقلبيه على نار متوسطة

 

 

الحين إخذي أوراق المشموم وقطعيه إلى شرائح وحطيه على خلطة

 

حطي البشاميل والفلفل الأسود

 

حطي الحين جبن البارميزان وقلبيه وخليه على نار هاديه لمدة دقايق لين يتسبك

 

وتتداخل النكهة عدل ،ضيفي ماي شويه علشان ما تنشف الصلصلة

 

آخر شي حطي المعكرونه وخلطيها مع الصلصلة عدل

 

 

حطي المعكرونه في صحن التقديم ورشي عليها البارميزان وبالعافيه

 

 

أخذت الوصفه من Home cooking  كانت لذيذه يمي