إستخدمت في هذي الوصفة البقسمات الياباني (panko) حطيتلكم صورته، وإذا مو متوفر عندج إخذي توست آو صمون وحطيه بالفرن لين يصير يابس تالي
تطحنينه وتستخدمينه، القيمر الجاهز متوفر بالجمعيات وسوق الديره ينباع بالكيلو وخلطت معاه شوية هيل مطحون وشوية ماي ورد، إذا تبين تسوينه بالبيت خلطي كوب حليب سائل مع ٢ ملعقة كبيرة نشا وحطيهم على النار وإستمري بالخلط لين يثخن بعدين حطي الهيل الناعم ونص كوب قيمرالعادي إللي بالعلب وشوية ماي ورد غطيه وخليه لين يبرد وإستخدميه، تقدرين تسوين الكيكة في قالب واحد بدل القالبين .
المقادير:
٢ كوب بقسمات ياباني(panko)
١ كوب فستق محمص
٢ ملعقة صغيرة بيكنج باودر
٤ بيضات كبيرة
١ ملعقة صغيرة هيل
١/٢ كوب زبدة (إصبع زبدة)
٣/٤ كوب سكر
شيرة باردة (قطر)
١/٤-١/٢ كيلو قيمر جاهز(قشطه)
فستق مطحون للتزيين
جلاش
سمن إو زبده سائحة
الطريقة :
إفردي الجلاش وإدهنيه بالسمنة السايحه (إشتغلي بسرعه علشان من تنشف رقائق الجلاش)
حطي شريحة ثانية من الجلاش
إدهني الجلاش بالسمنة وكرري الخطوات لين تحصلين على ٨ شرائح ولا تنسين الشريحه الأخيره تدهنينها بعد
إخذي القالب إلي بتسوين فيه الكيك وحطيه على الجلاش وقصيه على شكل قرصين دائريين
دخليها فرن حار (من تحت) لين تتحمر إذا شفتيها مو متحمره عدل بطلي الفرن من فوق دقايق تتحمر وطلعيها وخليها في الصينية
الحين نسوي الكيكة أول شي حطي السكر مع البيض (إستخدمي بيض كبير الحجم) والزبده وإخفي لين يبيض الخليط
حطي الفستق في الخلاط
حطي معاه البقسمات
حطي البيكنج باودر
شغلي الخلاط وطحني المكونات
حطي خلطة البقسمات المطحون على خليط البيض
وإخليطي لين يتجانس، أول شي بتحسنيه جنه ناشف وناقصه ماي لا تحطين شي وكملي الخلط لين تشوفينه تجانس وصار لونه أفتح
إخذي قالبين للكيك وإدهنيهم وبطني القاع بورق الزبده أو إدهنيهم بالزبده وبطنيهم بالطحين
وزعي الخليط الكيك في القالب بالتساوي (أستخدم ميزان علشان أضبط المقدار)
وإفرديه ، طقطقي القالب شويه علشان تتساوى أكثر
دخلي القالب الفرن ولا تنسين تكونين مبطله الفرن قبل لا تشتغلين بحرارة ١٨٠ درجة وإخبزيه لمدة ٣٥-٤٠ دقيقه تقريباً لين تنضج
الحين بعد ما نضجت الكيكة قلبيها وشيلي ورق الزبده من عليها وخليها في رف شبكي
وهي حاره حطي شوية شيره
حطي الفستق المطحون بالأطراف
إخذي كيكة وحطيها في صحن (ماعون) التقديم
حطي القيمر على الكيكة وتقدرين تخلطين شوية هيل مع القيمر قبل
إخذي قرص الجلاش وحطيها فوق القيمر
حطي مرة ثانيه الكيكة فوق الجلاش
مره ثانيه حطي القيمر فوق الكيكة
آخر شي حطي قرص الجلاش ورشي عليه الفستق وشوية شيره حسب الرغبه وبالعافية
هذا البقسمات إلى إستخدمته
ليست هناك تعليقات:
إرسال تعليق